"Um vandaða stjórnarhætti"

Ég var að lesa grein eftir Sigurð Líndal prófessor, sem birtist í Fréttablaðinu í dag, þar sem hann fjallar um skipun Árna Mathiesen á dómara við Héraðsdóm Norðurlands eystra og Hérðaðsdóm Austurlands. Áhugaverð og góð grein fyrir þá sem hafa áhuga á því að fylgjast með því á hvern hátt framkvæmdavaldið fer illa með það umboð og vald sem það hefur sótt til fólksins.

Ég fylgdist nokkuð náið með umræðum sem urðu á Alþingi í kjölfar þessa máls og verð að segja að margt kom mér þar á óvart. Mínir gömlu samflokksmenn fóru þar fremstir í flokki að verja þá gjörð, sem að mínu mati hefur ekki eingöngu kastað rýrð á ráðherrann og hans embættisfærslur, heldur hefur og vegið að sjálfstæði og trúverðugleika dómstólanna. Mér finnst það með ólíkindum að ungir þingmenn, sem margir hverjir eru löglærðir, skuli hafa reynt að verja þessa embættisfærslu með "froðurökum" og yfirhöfuð tekið þátt í umræðunni um þessi afglöp. Ráðherra sem fremur slík afglöp og misbeitir valdi sínu svo gróflega á að segja af sér. Hann á að sjá sóma sinn í því.

Umhugsunarefni er einnig í ljósi þeirra umræðna sem urðu um málið, hvernig "hugarheimur" þessara ungu þingmanna í mínum gamla flokki er. Eru þeir á þingi til að styrkja framkvæmdavaldið í landinu, draga úr áhrifum og eftirlitshlutverki Alþingis og vega að dómsvaldinu? Í umræðum sínum vóg þetta unga fólk að frelsi einstaklingsins og þrískiptingu valdsins, sem hvorutveggja eru hornsteinar lýðræðisins. Ég spyr mig því: "Er svona illa komið fyrir okkar flokki að grundvallarforsendur lýðræðisins eigi þar ekki lengur bústað?

Athugasemdir

[ee (IP-tala skráð) 25.1.2008 kl. 12:40]

Þakka þér fyrir greinina. Mættu margir lesa hana, svo vel sem grein Sigurðar, sér til umhugsunar.

Ástandið í þessum málum er svo alvarlegt að ég skil ekki hvernig stendur á því að það er ekki tekið á þeim.

Ef heiður er til í þessum flokki ætti að vera tími til kominn og það er vægt orðað, að spyrna í burtu þeim öflum sem að áfergi verja þær aðferðir sem stuðla að því að brjóta niður grundvallarstöðla lýðræðisins.

Hver staða þeirra afla er skiptir ekki máli, þar sem að um er að ræða svo mikilvæg atriði sem koma hverjum þjóðareinstaklingi við.  Annars á þessi flokkur fátæka framtíð í hugi allmennings.